ကာရေဘီယံပင်လယ်တောင်ပိုင်းသို့ အမေရိကန်စစ်သင်္ဘောများ ရောက်ရှိ၊ ဗင်နီဇွဲလားနှင့် ဆက်ဆံရေး တင်းမာနေ

အမေရိကန်ပြည်ထောင်စုနှင့် ဗင်နီဇွဲလားတို့အကြား ဆက်ဆံရေး တင်းမာနေကြောင်း Reuters သတင်းဌာနက ဖော်ပြပါတယ်။ အမေရိကန်အရာရှိများရဲ့ ပြောကြားချက်အရ လက်တင်အမေရိက မူးယစ်ဆေးဝါးဂိုဏ်းများရဲ့ ခြိမ်းခြောက်မှုများကို တုံ့ပြန် ရန်အတွက် အမေရိကန်ရေတပ်အင်အား အများအပြားကို ကာရေဘီယံပင်လယ်တောင်ပိုင်းနဲ့ အနီးတစ်ဝိုက် ရေပိုင်နက်များတွင် ချထားလိုက်ပြီလို့ သိရပါတယ်။

အမေရိကန်သမ္မတ ဒေါ်နယ်ထရမ့် (Donald Trump) က မူးယစ်ဂိုဏ်းများကို နှိမ်နင်းခြင်းဟာ သူ့အစိုးရရဲ့ အဓိကရည်မှန်းချက်ဖြစ်ပြီး ရွှေ့ပြောင်းနေထိုင်မှုများကိုလည်း ကန့်သတ်ခဲ့ကြောင်း၊အဆိုပါ လုပ်ဆောင်မှုဟာ အမေရိကန်နိုင်ငံရဲ့ တောင်ဘက်နယ်စပ်ကို လုံခြုံစေရန် ပိုမိုကျယ်ပြန့်သော ကြိုးပမ်းမှု အစိတ်အပိုင်းဖြစ်ကြောင်း ပြောပါတယ်။

အမေရိကန်ကမ်းခြေစောင့်တပ်နဲ့ ရေတပ်သင်္ဘောများဟာ ကာရေဘီယံပင်လယ်တောင်ပိုင်းမှာ ပုံမှန်လှုပ်ရှားလေ့ရှိပေမယ့် အခုလို အင်အားစုဖွဲ့မှုဟာ ပုံမှန်ထက် သိသိသာသာ ပိုများပါတယ်။ ဩဂုတ်လ ၂၈ ရက်နေ့က အမည်မဖော်လိုတဲ့ အမေရိကန်အရာရှိတစ်ဦးရဲ့ ပြောကြားချက်အရ အမေရိကန်စစ်သင်္ဘော ၇ စင်းနဲ့ နျူကလီးယားစွမ်းအင်သုံး တိုက်ခိုက်ရေးရေငုပ်သင်္ဘောတစ်စင်းဟာ ဒေသတွင်းကို ရောက်ရှိနေပြီ သို့မဟုတ် လာမယ့်သီတင်းပတ်အတွင်း ရောက်လာမယ်လို့ မျှော်လင့်ထားပါတယ်။

ဗင်နီဇွဲလားသမ္မတ နီကိုလပ်စ်မာဒူရို (Nicolás Maduro) က အမေရိကန်ရဲ့ အထက်ပါလုပ်ရပ်များကို ပြစ်တင်ရှုတ်ချခဲ့ပါတယ်။ ပင်တဂွန်စစ်ဌာနချုပ်ကတော့ အမေရိကန်ရဲ့ စစ်ရေးမစ်ရှင်ဟာ ဘယ်လိုလုပ်ဆောင်မှုမျိုးကိုမဆို လူသိရှင်ကြား ချပြသွားဦးမှာ မဟုတ်ပေမဲ့ ထရမ့်အစိုးရအနေနဲ့ မူးယစ်ဆေးဝါးနဲ့ ရာဇဝတ်ဂိုဏ်းတွေကို နှိမ်နင်းဖို့အတွက် စစ်တပ်ကို အသုံးပြုနိုင်ပြီဖြစ်ကြောင်း ပြောကြားခဲ့ပါတယ်။ ထို့ပြင် ပင်တဂွန်ကိုလည်း လုပ်ဆောင်နိုင်မယ့် နည်းလမ်းတွေကို ပြင်ဆင်ထားဖို့ အစိုးရအဖွဲ့က ညွှန်ကြားခဲ့ပါတယ်။

ဗင်နီဇွဲလားက ဩဂုတ် ၂၈ ရက်နေ့တွင် ကုလသမဂ္ဂအတွင်းရေးမှူးချုပ် အန်တိုနီယိုဂူတာရက်စ် (Antonio Guterres) ဆီ အမေရိကန်ရေတပ်အင်အား ချထားမှုနှင့် ပတ်သက်ပြီး ပန်ကြားလွှာတစ်စောင် ပေးပို့ခဲ့ပြီး ဝါရှင်တန်ဟာ ကုလသမဂ္ဂအခြေခံဥပဒေကို ချိုးဖောက်နေကြောင်း စွပ်စွဲခဲ့ပါတယ်။

ဂူတာရက်စ်နှင့် တွေ့ဆုံပြီးနောက် ကုလသမဂ္ဂဆိုင်ရာ ဗင်နီဇွဲလားသံအမတ် ဆာမူယယ်မွန်ကာဒါ (Samuel Moncada) က “ဒါဟာ ပညာရှင်တွေက စစ်ရေးဝင်ရောက်စွက်ဖက်မှုလို့ ခေါ်တဲ့ ရုပ်ပိုင်းဆိုင်ရာတိုက်ခိုက်မှု (kinetic action) ကို တရားမျှတအောင် လုပ်ဖို့ ကြီးမားတဲ့ ဝါဒဖြန့်ချိရေး လှုပ်ရှားမှုတစ်ခုပါပဲ။ ဘာကြောင့်လဲဆိုတော့ ဗင်နီဇွဲလားဟာ အချုပ်အခြာအာဏာပိုင်ပြီး လွတ်လပ်တဲ့နိုင်ငံဖြစ်ပြီး ဘယ်သူ့ကိုမှ ခြိမ်းခြောက်နေတာမဟုတ်ပါဘူး” ဟု သတင်းထောက်များကို ပြောကြားခဲ့ပါတယ်။

ဩဂုတ် ၂၈ ရက်က အိမ်ဖြူတော်တွင် ထရမ့်က “မူးယစ်ဆေးဝါးတွေ ကျွန်တော်တို့နိုင်ငံထဲ ဝင်ရောက်လာတာကို ရပ်တန့်ဖို့အတွက် အမေရိကန်ရဲ့ စွမ်းရည်တိုင်းကို အသုံးပြုဖို့ အသင့်ရှိနေပါပြီ” လို့ ပြောခဲ့ပါတယ်။

“ကာရေဘီယံနိုင်ငံများစွာနဲ့ ဒေသတွင်းနိုင်ငံအများအပြားကလည်း အစိုးရရဲ့ မူးယစ်ဆေးဝါးတိုက်ဖျက်ရေး စစ်ဆင်ရေးနဲ့ ကြိုးပမ်းမှုတွေကို ချီးကျူးခဲ့ကြပါတယ်” လို့ အိမ်ဖြူတော် သတင်းပြန်ကြားရေးအတွင်းဝန် ကာရိုလိုင်းလီဗစ် (Caroline Leavitt) က ပြောပါတယ်။

ထရမ့်အစိုးရဟာ မက္ကဆီကိုနိုင်ငံရှိ စီနာလိုအာမူးယစ်ဂိုဏ်းနှင့် အခြားမူးယစ်ဂိုဏ်းများကိုအပြင် ဗင်နီဇွဲလား ဒုစရိုက်ဂိုဏ်းဖြစ်တဲ့ ထရန်ဒီအာရာဂူအာ (Tren de Aragua) ကိုပါ ပြီးခဲ့တဲ့ ဖေဖော်ဝါရီလမှာ ကမ္ဘာလုံးဆိုင်ရာ အကြမ်းဖက်အဖွဲ့အစည်းအဖြစ် သတ်မှတ်ခဲ့ပါတယ်။

ရေတပ်အင်အားဖြည့်တင်းမှုရဲ့ တစ်စိတ်တစ်ပိုင်းအနေနဲ့ ယူအက်စ်အက်စ် ဆန်အန်တိုနီယို (USS San Antonio)၊ ယူအက်စ်အက်စ် အိုင်အို ဂျီးမား (USS Iwo Jima) နဲ့ ယူအက်စ်အက်စ် ဖို့တ်လော့ဒါဒေးလ် (USS Fort Lauderdale) သင်္ဘောတွေနဲ့အတူ သင်္ဘောသား ၄,၅၀၀ လိုက်ပါလာပြီး အဲဒီထဲမှာ ရေတပ်သားအင်အား ၂,၂၀၀ ပါဝင်တယ်လို့ သတင်းရင်းမြစ်တွေက Reuters ကို ပြောပါတယ်။ အမေရိကန်စစ်တပ်က နိုင်ငံတကာရေပိုင်နက်တွေမှာ ထောက်လှမ်းရေးအချက်အလက်တွေ စုဆောင်းဖို့ P-8 လေယာဉ်တွေကိုလည်း ပျံသန်းစေခဲ့တယ်လို့ အရာရှိတွေက ပြောပါတယ်။

သမ္မတမာဒူရိုက “ကျွန်တော်တို့ရဲ့ သံတမန်ရေးရာက အမြောက်တွေရဲ့ ဒါမှမဟုတ် ခြိမ်းခြောက်မှုတွေရဲ့ သံတမန်ရေးရာမဟုတ်ပါဘူး။ ဘာကြောင့်လဲဆိုတော့ အခုကမ္ဘာကြီးက လွန်ခဲ့တဲ့ နှစ်ပေါင်း ၁၀၀ က ကမ္ဘာကြီးလို ဖြစ်နေတာ မဟုတ်တော့လို့ပါ” ဟု ပြောပါတယ်။

သူ့ရဲ့အစိုးရက ပြီးခဲ့တဲ့သီတင်းပတ်က မူးယစ်ဆေးဝါးရောင်းဝယ်သူတွေကို တိုက်ဖျက်ဖို့အတွက် ကိုလံဘီယာနဲ့ နယ်စပ်တစ်လျှောက်ရှိ ပြည်နယ်တွေဆီကို တပ်ဖွဲ့ဝင် ၁၅,၀၀၀ စေလွှတ်မယ်လို့ ပြောခဲ့ပါတယ်။ မာဒူရိုဟာ အရပ်ဘက်ကာကွယ်ရေးအဖွဲ့တွေကိုလည်း သောကြာနေ့နဲ့ စနေနေ့တိုင်း လေ့ကျင့်ရေးလုပ်ဖို့ တိုက်တွန်းခဲ့ပါတယ်။

အတိုက်အခံတွေနဲ့ နိုင်ငံခြားသားတွေဟာ စီအိုင်အေ (CIA) လိုမျိုး အမေရိကန်အဖွဲ့အစည်းတွေနဲ့ ပူးပေါင်းပြီး ဗင်နီဇွဲလားကို ထိခိုက်စေဖို့ ကြံစည်နေတယ်လို့ မာဒူရိုအစိုးရက ပုံမှန်စွပ်စွဲလေ့ရှိပြီး ဒီစွပ်စွဲချက်တွေကို အတိုက်အခံတွေနဲ့ အမေရိကန်ကတော့ အမြဲတမ်း ငြင်းဆိုနေကျဖြစ်ပါတယ်။ ဗင်နီဇွဲလားအစိုးရက အမေရိကန်ပိတ်ဆို့အရေးယူမှုတွေကို “စီးပွားရေးစစ်ပွဲ” လို့လည်း သတ်မှတ်ပြောဆိုခဲ့ပါတယ်။

#mercury#mercurynews#နိုင်ငံတကာသတင်း#ဗင်နီဇွဲလား#အမေရိကန်