ဆိုက်ကလုန်းမုန်တိုင်းဖြစ်နိုင်ခြေရှိလာ၊ ကမ်းခြေသွားမည့်သူများ၊တောင်သူများ၊ဆားလုပ်ငန်းလုပ်သူများသတိထားရန်လို

———————————————————————–

၂၀၂၅ခုနှစ်၊နိုဝင်ဘာလ၊(၂၀)ရက်

မြန်မာနိုင်ငံအနီးပင်လယ်ပြင်မှာ ဆိုက်ကလုန်းမုန်တိုင်းဖြစ်နိုင်ခြေ(၇၀)ရာခိုင်နှုန်းရှိလာလို့ ကမ်းခြေခရီးသွားမယ့်သူတွေ၊ စပါးရိတ်သိမ်းဆဲတောင်သူတွေ၊ဆားလုပ်ငန်းလုပ်သူတွေအနေနဲ့ သတိထားဖို့လိုအပ်တယ်လို့ မိုးလေဝသပညာရှင်ဦးဝင်းနိုင်က သတိပေးပြောကြားထားပါတယ်။

ဘင်္ဂလားပင်လယ်အော်တောင်ပိုင်းနဲ့ အနောက်တောင်ပိုင်းမှာ နိုဝင်ဘာလ ၂၂ မှ ၂၄ ရက်နေ့အတွင်း လေဖိအားနည်းရပ်ဝန်းတခုဖြစ်ပေါ်ရာမှ ပိုမိုအားကောင်းလာပြီး အနည်းဆုံးမုန်တိုင်းငယ် (Deep Depression) ဖြစ်လာနိုင်ပြီးECMWF Chart များအရ ဆိုင်ကလုန်းမုန်တိုင်းဖြစ်နိုင်ချေ ၇၀% ရှိနေကြောင်းလည်းတွေ့ရတယ်လို့ဆိုပါတယ်။

နိုဝင်ဘာ ၂၅ ရက် မှာဖြစ်လာနိုင်တဲ့ မုန်တိုင်းကြောင့် ဧရာဝတီတိုင်းတောင်ပိုင်းဒေသအချို့မှာ မိုးအနည်းငယ်ရွာနိုင်ပြီး၊ လေပြင်းတနာရီ ၁၅ မိုင်မှ မိုင် ၃၀ ခန့်အထိ တိုက်နိုင်ပြီး မြစ်ဝကျွန်းပေါ်ကမ်းရိုးတန်းအနီးပင်လယ်ကမ်းခြေမှာ လှိုင်းအမြင့် ၆ ပေ မှ ၇ ပေခန့် ရှိနိုင်တယ်လို့ ခန့်မှန်းထားပါတယ်။

GFS Model ကြိုတင်ခန့်မှန်းချက်အရ တနင်္သာရီတိုင်းတောင်ပိုင်းအစွန် ကော့သောင်းခရိုင်နဲ့ မွန်ပြည်နယ် ကျိုက်ထိုခရိုင်တို့မှာ မိုးအသင့်အတင့်မှ မိုးအနည်းငယ်များနိုင်ပြီး ကျန်ပြည်နယ်တိုင်းအားလုံးမှာ မိုးအနည်းငယ်သာရွာသွန်းနိုင်ကာ၊ဧရာဝတီတိုင်းမှ စပါးရိတ်သိမ်းဆဲတောင်သူများ၊ ဆားလုပ်ငန်း ဆားကွင်းများမှာ မိုးအနည်းငယ်ရွာနိုင်သလို ဧရာဝတီတိုင်းအနောက်ဘက် (ငွေဆောင်+ချောင်းသာ ကမ်းခြေများ)နှင့် ရခိုင်ပြည်နယ်တောင်ပိုင်း ကမ်းရိုးတန်းဒေသအချို့မှာ မိုးအနည်းငယ်နှင့် လေတိုက်နှုန်း တနာရီ ၃၀ မိုင်ခန့် တိုက်ခတ်နိုင်တယ်လို့ ဖော်ပြထားပါတယ်။

#mercury#mercurynews#မြန်မာ#မိုးလေဝသ#ပြည်တွင်းသတင်း