ဌာနဆိုင်ရာဟန်ဆောင်ပြီးအွန်လိုင်းငွေလိမ်နည်း(၅) မျိုးအသုံးပြုပြီးနှစ်စဉ်ကျပ်သန်းပေါင်း(၅၀၀၀)နှင့်အထက်အလိမ်ခံနေရ

ပြီးခဲ့တဲ့ရက်ပိုင်းက ဖြစ်ပွားခဲ့တဲ့ ဌာနဆိုင်ရာဟန်ဆောင်ပြီး အွန်လိုင်းကနေငွေကြေးလိမ်လည်မှု အပါအဝင်အွန်လိုင်း ငွေလိမ်နည်း(၅)မျိုးအသုံးပြုလိမ်လည်နေသဖြင့် သတိထားဖို့လိုအပ်တယ်လို့ သိရပါတယ်။

ပြည်တွင်းအခွန်များဦးစီးဌာနရဲ့ အမည်နဲ့တံဆိပ် (Logo) ကိုအသုံးပြုပြီး အွန်လိုင်းငွေကြေးလိမ်လည်မှုများ ဖြစ်ပွားနေခြင်းနဲ့ပတ်သက်လို့ အခွန်ထမ်းပြည်သူတွေအနေနဲ့ အထူးသတိပြုကြဖို့ သက်ဆိုင်ရာဌာနက အသိပေးကြေညာ ချက်တစ်ရပ်ထုတ်ပြန်ခဲ့တယ်လို့ဆိုပါတယ်။

အွန်လိုင်းလိမ်လည်မှုတွေကြောင့် မြန်မာပြည်သူတွေအတွင်း နှစ်စဉ်ငွေကျပ်သန်းပေါင်း ၅၀၀၀ နဲ့အထက် ဆုံးရှုံးနေတယ်လို့ဆိုရာ လိမ်လည်မှုဘေးမှ ကင်းဝေးစေရေးအတွက် သတိတမန်၊ ဉာဏ်မြေကတုတ်ပြုကာ ဓနဥစ္စာတို့ကို ကောင်းစွာစောင့်ရှောက်ဖို့လည်းတိုက်တွန်းထားပါတယ်။

ငွေကြေးဆိုင်ရာ အရေးယူဆောင်ရွက်ရေးအဖွဲ့ရဲ့ ၂၀၂၃ ခုနှစ်က ထုတ်ပြန်တဲ့ အစီရင်ခံစာအရ အွန်လိုင်းလိမ်လည်မှုအများဆုံး ကျူးလွန်သည့်ပုံစံ (၅) မျိုးမှာ (၁) Application များ၊ Website အတုများ အသုံးပြု၍ သတင်း အချက်အလက်များ ရယူလိမ်လည်ခြင်း (Phishing Fraud)။

(၂) ဘဏ်နှင့်ငွေရေးကြေးရေး အဖွဲ့အစည်းများ သို့မဟုတ် မိုဘိုင်း ငွေကြေးဝန်ဆောင်မှုလုပ်ငန်းများ၏ ဝန်ထမ်းအယောင်ဆောင်၍ လိမ်လည်ခြင်း (Social Media and Telecommunication Fraud)။

(၃) အွန်လိုင်းပေါ်တွင် ခင်မင်ရင်းနှီးအောင်ပြုလုပ်၍ လိမ်လည်ခြင်း (Online Romance Fraud)။

(၄) အရောင်းအဝယ် လုပ်ငန်းများ၊ ရင်းနှီးမြှုပ်နှံမှုလုပ်ငန်းများကိုအကြောင်းပြ၍ လိမ်လည်ခြင်း (Online Trading/ Trading Platform Fraud)။

(၅) အလုပ်အကိုင်ရရှိမည်ဟု အကြောင်းပြ၍ လိမ်လည်ခြင်း (Employment Scam) တို့ဖြစ်တယ်လို့ သိရပါတယ်။

#mercury#mercurynews#လိမ်လည်မှု#မြန်မာ#ပြည်တွင်းသတင်း