တက္ကသိုလ်ဝင်တန်းဖြေဆိုမည့်သူများ စက်တင်ဘာလ(၁)ရက်မှစပြီး ဖြေဆိုခွင့်လျှောက်လွှာများ

လာမယ့်၂၀၂၆ ခုနှစ်၊ တက္ကသိုလ်ဝင်တန်းဖြေမယ့်သူတွေအနေနဲ့ စက်တင်ဘာလ(၁)ရက်မှ စက်တင်ဘာလ(၃၀)ရက်အတွင်း ဖြေဆိုခွင့်ကတ်ပြားနဲ့လျှောက်လွှာတွေလျှောက်ထားနိုင် တယ်လို့ မြန်မာနိုင်ငံစာစစ်ဦးစီးဌာန ရဲ့ ထုတ်ပြန်ချက်အရ သိရပါတယ်။

ကျောင်းဖြေအဖြစ် ဖြေဆိုမည့်သူတွေအနေနဲ့ မိမိတို့တက်ရောက်နေတဲ့ ကျောင်းမှတစ်ဆင့် လျှောက်လွှာတင်ရမှာဖြစ်ပြီးပြင်ပဖြေအဖြစ် ဖြေဆိုမည့်သူတွေဟာ မိမိတို့ ဖြေဆိုမည့် မြို့နယ်ရှိ မြို့နယ်ပညာရေးမှူးရုံးမှ တစ်ဆင့် လျှောက်လွှာတင်ရမယ်လို့ဆိုပါတယ်။

ပညာရေးဝန်ကြီးဌာန ငွေသွင်းတံဆိပ်ခေါင်းတွေနဲ့ လျှောက်လွှာများဝယ်ယူပြီး ဖြေဆိုခွင့်လျှောက်လွှာရဲ့ လက်ဝဲဘက်ထိပ်ပိုင်းမှာ အဆိုပါငွေသွင်းတံဆိပ်ခေါင်းကပ်ပြီး မိမိတို့ အမှန်တကယ်နေထိုင်သည့် မြို့နယ်ပညာရေးမှူးရုံးတွင် ၂၀၂၅ ခုနှစ်၊ စက်တင်ဘာ ၁ ရက်မှ စက်တင်ဘာ ၃၀ ရက်အတွင်း တင်သွင်းကြရမည်ဖြစ်ကြောင်း၊ သတ်မှတ်ထားသောရက်များအတွင်း အချိန်မီပေးပို့ခြင်း မရှိသူတွေဟာ စာမေးပွဲဖြေဆိုခွင့်ရရှိကြမှာမဟုတ်ဘူးလို့ ထုတ်ပြန်ချက်မှာ ဖော်ပြပါရှိပါတယ်။