ထိုင်းနိုင်ငံ၊ ကရာဘီခရိုင်ရှိ စားအုန်းဆီစက်ရုံတွင် မြန်မာအလုပ်သမား ၂ ဦး အဆိပ်ငွေ့ရှူမိ၍ သေဆုံး

၂၀၂၅၊နိုဝင်ဘာလ၊၁၅ရက်

ထိုင်းနိုင်ငံတောင်ပိုင်း၊ ကရာဘီခရိုင်၊ ပလိုင်ဖလာရာခရိုင်ခွဲရှိ စားအုန်းဆီကုမ္ပဏီတစ်ခုမှာ ဓာတုကန်သန့်ရှင်းရေး လုပ်ငန်းဆောင်ရွက်နေတဲ့ မြန်မာအလုပ်သမား ၂ ဦးဟာ အဆိပ်ငွေ့ရှူရှိုက်မိပြီး သေဆုံးခဲ့ကြောင်း ထိုင်းအာဏာပိုင်များက ထုတ်ပြန်ခဲ့ပါတယ်။

အဆိုပါ ကန်မှာ ဟိုက်ဒရိုဂျင်ဆာလဖိတ် (Hydrogen Sulfide) ပါဝင်ကာ ဒေသခံများက ကြက်ဥပုပ်ဓာတ်ငွေ့ ဟု ခေါ်ဆိုကြသော အဆိပ်ငွေ့များ ပါဝင်ပြီး ထိုင်းရဲတပ်ဖွဲ့ရဲ့ ဖော်ပြချက်အရ မြန်မာအလုပ်သမား ၃ ဦးဟာ အဆိပ်ငွေ့ အလွန်အကျွံရှူသွင်းမိပြီး သတိလစ်မေ့မြောသွားခဲ့ခြင်းဖြစ်ပါတယ်။

အဆိပ်ငွေ့များရှူရှိုက်မိခဲ့တဲ့ မြန်မာအလုပ်သမား ၃ ဦးထဲက အသက် ၂၄ နှစ်အရွယ် ကိုရှိုင်းလင်းအောင်၊အသက် ၂၅ နှစ်အရွယ် ကိုကျော်လင်းဦးတို့က သေဆုံးခဲ့ရပြီး အသက် ၂၂ နှစ်အရွယ် ကိုပိုင် ကို ထိုင်းကယ်ဆယ်ရေးအဖွဲ့က အချိန်မီ ကယ်ထုတ်နိုင်ခဲ့ပြီး ဆေးရုံကို ပို့ဆောင်ပေးနိုင်ခဲ့တယ်လို့ ထိုင်းသတင်းဌာနတွေက ဖော်ပြပါတယ်။