ရန်ကုန်မှ မလေးရေပိုင်နက်သို့ မူးယစ်ဆေးပို့ဆောင်သည့်မူးယစ်မှောင်ခိုဂိုဏ်း ဖမ်းမိ

ရန်ကုန်မှ မလေးရေပိုင်နက်သို့ မူးယစ်ဆေးပို့ဆောင်တဲ့ မူးယစ်မှောင်ခိုဂိုဏ်းဖမ်းမိခဲ့တယ်လို့ မြန်မာနိုင်ငံရဲတပ်ဖွဲ့ရဲ့ ထုတ်ပြန်ချက်အရ သိရပါတယ်။

ရန်ကုန်တိုင်း၊ ရွှေပြည်သာမြို့နယ်နဲ့ ကွမ်းခြံကုန်းမြို့နယ်တို့မှာ ရခိုင်ပြည်နယ်နဲ့ မလေးရှားရေပိုင်နက်သို့ ပို့ဆောင်မယ့် မူးယစ်မှောင်ခိုဂိုဏ်းအဖွဲ့တွေ ငွေကျပ် ၂၅၇ ဒသမ ၁၀၅ ဘီလီယံတန်ဖိုးရှိ စိတ်ကြွရူးသွပ် ဆေးပြား ၂၁၈ သိန်း၊ အိုက်စ်(မက်သ်အဖက်တမင်း) ၅၆၁၄ ဒသမ ၂ ကီလို၊ ကက်တမင်း ၁၈၉၉ ကီလိုတို့နဲ့အတူ ဖော်ထုတ်ဖမ်းဆီးရမိခဲ့တာဖြစ်ပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်တဲ့ ပူးပေါင်းအဖွဲ့ဟာ ဩဂုတ် ၅ ရက် နံနက် ၆ နာရီခွဲမှာ သတင်းအရ ရွှေပြည်သာမြို့နယ် အမှတ်(၄)လမ်းမကြီးနှင့် ငါးကန်လမ်းထောင့်မှာ အောင်လင်း မောင်းနှင်လာတဲ့ CANTER BOX ယာဉ်နဲ့ သောင်းထွန်း မောင်းနှင်လာတဲ့ SUBARU STELLA ယာဉ်တို့ကို ရပ်တန့်စစ်ဆေးရှာဖွေခဲ့ရာ ၎င်းတို့သယ်ဆောင်လာတဲ့ စိတ်ကြွရူးသွပ်ဆေးပြား သိန်း ၄၀ အား ဖမ်းဆီးရမိခဲ့ပြီး ကွင်းဆက်လိုက်ရာမှာ ဆက်လက်ဖမ်းမိခဲ့တာဖြစ်တယ်လို့ဆိုပါတယ်။

ဖြစ်စဉ်မှာ ဖမ်းဆီးရမိတရားခံ ၁၃ ဦး၊ ဖမ်းဆီးရန်ကျန်တရားခံ ကိုးဦးတို့ကို မူးယစ်ဆေးဝါးနဲ့ စိတ်ကိုပြောင်းလဲ စေသော ဆေးဝါးများဆိုင်ရာဥပဒေအရ အရေးယူထားရှိပြီး ကွင်းဆက်ပြစ်မှု ကျူးလွန်သူများကို ဆက်လက်ဖော်ထုတ်လျက်ရှိတယ်လို့ ဖော်ပြထားပါတယ်။

အဲဒီ့ မူးယစ်မှောင်ခိုဂိုဏ်းအဖွဲ့ဟာ စိတ်ပြောင်းဆေးဝါးတွေကိုရှမ်းပြည်နယ်မှ ရခိုင်ပြည်နယ်နဲ့ မလေးရှားရေပိုင်နက်တို့သို့ ကုန်းလမ်းနှင့် ပင်လယ်ရေကြောင်းတို့ကို အသုံးပြုပြီး သယ်ဆောင်ရောင်းဝယ်မှု အကြိမ်ကြိမ်ကျူးလွန်ခဲ့ကြောင်း ဖော်ထုတ်ရရှိသဖြင့် ထိရောက်စွာအရေးယူနိုင်ရေးနဲ့

၎င်းတို့ မူးယစ်ဆေးဝါးသယ်ဆောင်ရောင်းဝယ်ရာမှရရှိတဲ့ ငွေကြေးအကျိုးအမြတ်တွေ၊ ပိုင်ဆိုင်မှုတွေကို ပြည်သူ့ဘဏ္ဍာအဖြစ် သိမ်းဆည်းနိုင်ရေးအတွက် ငွေကြေးခဝါချမှုတိုက်ဖျက်ရေးဥပဒေဖြင့် ထပ်မံအရေးယူနိုင်ရေး ဆောင်ရွက်လျက်ရှိတယ်လို့ သိရပါတယ်။

#mercury#mercurynews#မူးယစ်ဆေးဝါး#မြန်မာ#ပြည်တွင်းသတင်း