ရုရှားထောက်လှမ်းရေးသင်္ဘော ‘ယန်တာ’ ခြိမ်းခြောက်လာပါက စစ်ရေးနည်းဖြင့် တုံ့ပြန်ရန် ဗြိတိန် အသင့်ရှိဟု သတိပေး

၂၀၂၅၊နိုဝင်ဘာလ၊၂၀ရက်

ဗြိတိန်ကာကွယ်ရေးဝန်ကြီး ဂျွန် ဟေလီ (John Healey) ဟာ နိုဝင်ဘာလ ၁၉ ရက်နေ့မှာ ရုရှားထောက်လှမ်းရေးသင်္ဘော ‘ယန်တာ’ (Yantar) ကို စစ်ရေးနည်းလမ်းများနဲ့ တုံ့ပြန်ရန် အသင့်ရှိကြောင်း ပြင်းထန်စွာ သတိပေးလိုက်ပါတယ်။အဆိုပါသင်္ဘောဟာ စကော့တလန်မြောက်ပိုင်းရှိ ဗြိတိန်ရေပိုက်နက် အစွန်းပိုင်းကို ချဉ်းကပ်လာခဲ့ခြင်းဖြစ်ပါတယ်။

ယန်တာသင်္ဘောဟာ စောင့်ကြည့်ရန် စေလွှတ်ခဲ့တဲ့ တော်ဝင်လေတပ် (RAF) လေယာဉ်မှူးများကို သင်္ဘောပေါ်ကနေ လေဆာဖြင့် လှမ်းထိုးခဲ့ပြီး အဆိုပါလုပ်ရပ်ဟာ ဗြိတိန်ရဲ့ စိုးရိမ်ပူပန်မှုကို ပိုမိုမြင့်တက်စေခဲ့ပါတယ်။

ကာကွယ်ရေးဝန်ကြီး ဟေလီက ရုရှားသမ္မတ ဗလာဒီမာ ပူတင်ကို တိုက်ရိုက်ရည်ညွှန်းပြောဆိုရာမှာ “ခင်ဗျားတို့ ဘာလုပ်နေလဲဆိုတာ ကျနော်တို့ သိတယ်၊ မြင်နေရတယ်” လို့ ပြောခဲ့ပြီး ယန်တာသင်္ဘောအနေနဲ့ လမ်းကြောင်းမပြောင်းဘဲ တောင်ဘက်ကို ဆက်လက်ဆင်းလာပါက စစ်ရေးအရ အရေးယူဆောင်ရွက်ရန် အသင့်ပြင်ထားကြောင်းပြောထားပါတယ်။

ဝန်ကြီး ဟေလီက ရုရှားသင်္ဘောများ ဗြိတိန်ပိုင်နက်အနီးသို့ ရောက်လာချိန်မှာ ပိုမိုနီးကပ်စွာ စောင့်ကြည့်နိုင်ရန်အတွက် ရေတပ်ရဲ့ ထိတွေ့တိုက်ခိုက်မှုဆိုင်ရာ စည်းမျဉ်း (Rules of Engagement) များကို ပြောင်းလဲသတ်မှတ်လိုက်ကြောင်းလည်း ထုတ်ဖော်ပြောကြားခဲ့ပါတယ်။

#mercury#mercurynews#နိုင်ငံတကာသတင်း#ရုရှား#ဗြိတိန်