လမ်းမတော်မြို့နယ်တွင် Light Truck ယာဉ် အရှိန်လွန်ကာ လမ်းသွားလမ်းလာများကို ဝင်တိုက်၊ ၁ ဉီး သေဆုံးပြီး ၃ ဦး ဒဏ်ရာရ

၂၀၂၅၊နိုဝင်ဘာလ၊၂၀ရက်

ရန်ကုန်တိုင်းဒေသကြီး၊ လမ်းမတော်မြို့နယ်၊ မော်တင်ယာယီဈေးရပ်ကွက်၊ ကျောက်လမ်းပေါ်မှာ ယနေ့ (နိုဝင်ဘာလ ၂၀ ရက်) နေ့လယ် ၂ နာရီ ၃၈ မိနစ်အချိန်က Light Truck ယာဉ်တစ်စီး အရှိန်လွန်ကာ လမ်းသွားလမ်းလာများကို ဝင်တိုက်ပြီး တိမ်းမှောက်မှုဖြစ်ပွားခဲ့ရာ လူ ၁ ဦး သေဆုံးပြီး ၃ ဦး ဒဏ်ရာရရှိခဲ့ကြောင်းသိရပါတယ်။

ယာဉ်တိုက်မှုဖြစ်ပွားပြီးနောက် ကျောက်တံတားမြို့နယ်မီးသတ်စခန်းက မီးငြှိမ်းသတ်ယာဉ် (၁) စီးနဲ့ ရှာဖွေကယ်ဆယ်ရေးလုပ်ငန်းများ ဆောင်ရွက်ခဲ့ပြီး ယာဉ်တိုက်မှုကြောင့် ထိခိုက်ဒဏ်ရာရရှိခဲ့သူ ၃ ဦးကို ပတ်ဝန်းကျင်ရှိ ပြည်သူများက ဆေးရုံသို့ အလျင်အမြန် ပို့ဆောင်ပေးခဲ့တယ်လို့ မီးသတ်ဦးစီးဌာနက ထုတ်ပြန်ထားပါတယ်။

ယာဉ်တိုက်မှုမှာ သေဆုံးခဲ့သူ အမျိုးသား (၁) ဦးရဲ့ ရုပ်အလောင်းအား အေးမေတ္တာလူမှုကူညီရေးအသင်းရဲ့ လူနာတင်ယာဉ်နဲ့ ရန်ကုန်ပြည်သူ့ဆေးရုံကြီးဆီ ပို့ဆောင်ပေးခဲ့ကြောင်း ထုတ်ပြန်ချက်အရ သိရပါတယ်။